переправа



Праздник Сретения Господа нашего Иисуса Христа в Церковных песнопениях



Опубликовано: 15-02-2020, 16:00
Поделится материалом

Вера


Праздник Сретения Господа нашего Иисуса Христа в Церковных песнопениях

 

1. История праздника:

 

Чистая и пречистая Дева, носящи Содетеля и Владыку, яко Младенца, на руках, в церковь входит. Чистая голубица, нескверная Агница Агнца и Пастыря приносит в церковь. К Богородице притецем хотящии Сына Ея видети, к Симеону носима, Егоже с небесе бесплотнии видяще, дивляхуся глаголюще: чудная зрим ныне и преславная, непостижимая, несказанная: Иже бо Адама создавый — носится яко Младенец! Невместимый вмещается на руках старчих! Небесный лик Небесных Ангел приник на землю, пришедша зрит Перворожденна всея твари, яко Младенца носима ко храму от Матере неискусомужныя, — предпразднственную убо песнь с нами поют радующеся.

 

Двери небесныя, отверзитеся: Христос бо в церковь, яко Младенец, Материю Девою Богу и Отцу приносится.

 

Приими, о Симеоне, — всечистая вопияше, в объятия, яко Младенца, Господа славы и мира спасение.

 

Восприими, о Симеоне, Господа славы, как известился еси от Духа Святаго: се бо прииде. Разумев Божественный старец славу, проявленную древле пророку, зря Слово, держимо матерними руками, вопияше: о, радуйся, Чистая, яко престол бо держиши Бога, Света невечерняго, и миром владычествующа.

 

Поклонся старец и Божественне прикоснувся стопам Неискусобрачныя и Богоматере, рече: Огнь носиши, Чистая, боюся объяти Младенца Бога.

 

Младенца видев Тя, Предвечнаго Слова от Отца рожденна, вопияше чудный Симеон: страшуся и боюся руками моими объяти, Владыко, но с миром, раба Твоего, ныне отпусти, яко Милосерд.

 

Зрю Тя на руках Матерних, вем же Тя неприступна естеством Божества: како убо, Слове, руками держим еси. Иже в руце всю тварь имаши, Богочеловече? — рече Симеон, славя Твою неизреченную силу.

 

Священнаго священная Дева принесе во святилище святителю; простер же руце Симеон, прием Сего радуяся и возопи: ныне отпущаеши раба Твоего, Владыко, по глаголу Твоему с миром.

 

Глаголи, Симеоне, Кого нося на руку в церкви радуешися? Кому зовеши и вопиеши: Видех Спаса моего: Сей есть от Девы рождейся; Сей есть от Бога Бог Слово, воплотивыйся нас ради и спасый Человека: Тому поклонимся.

 

Носимаго на колеснице Херувимстей и певаемаго в песнех Серафимских носящи на руку, Богородица Мария, неискусобрачно из Нея воплощшагося, Законодавца, закона иполняюща чин (устав), подаяше рукам старца иерея; тойже, Живот носяй, живота разрешение прошаше, глаголя: Владыко, ныне отпусти мя возвестити Адаму, яко видех Отроча непреложна Бога превечнаго и Спаса мира.

 

Иду, хотяй известити Адаму, во аде живущу, и Еве принести благовестие — Симеон вопияше.

 

На горе Синайской древле виде Моисей задняя Божия и сподобися тонкий Божественный глас во мраце и вихре слышати; ныне же Симеон непреложне нас ради воплощеннаго Бога на руки прият и радостно тщашеся ити от сущих зде к животу вечному, — темже вопияше: ныне отпущаеши раба Твоего, Владыко.

 

Творца веков старец яко Младенца прием, разуме Бога предвечнаго и света языков Христа, в славу Израиля.

 

Страхом же и радостию держа на руках Владыку, Симеон прошаше разрешения живота, поя Богоматерь.

 

Отроча принесши всенепорочная Отроковица во святилище, совершити яже по закону, и Сйе на руки егда прият Симеон праведный, противуизрече Девице: Сей лежит на падение и на востание многим и в знамение в мире.

 

Живот сый, Сей будет падение непокоривым, востание всем, верою поющим.

 

Рода земна избавляли Бог даже до ада приидет, плененным же (тамо) подаст всем оставление, и прозрение слепым, яко и немым вопити: благословен Бог Отец наших.

 

И Твое сердце, Нетленная, оружие пройдет, Симеон Богородице провозгласи, на крест зрящи Твоего Сына.

 

Священнолепно исповедаше Владыце Анна целомудренная и преподобная и старица, прорицающи в церкви явственно, Богородицу же величаше, проповедующи всем сущим.

 

Анна целомудренная провещает страшная, исповедающи Христа, Творца небу и земли".

 

2. Славословия празднику:

 

"Перворожден из Отца прежде века, перворожден Младенец из Девы нетленныя явися, Адаму руку простирая.

 

Младенец плотию, Ветхий деньми, видим есть преславно в днешний день и в церковь приносится.

 

Зиждитель небесе и земли на руках днесь ношашеся святым Симеоном старцем, той бо Духом Святым глаголаше: ныне сво-бодихся, видех бо Спаса моего.

 

Закон иже в Писании исполняя, Человеколюбец в церковь ныне приносится, и Сего приемлет старыми руками старец Симеон, вопия: ныне отпущаеши мя ко оному блаженству, видех бо Тя днесь плотию мертвенною обложеннаго, животом господствующа и смертию владычествующа.

 

Ветхий деньми, Иже закон древле в Синаи дав Моисею, днесь Младенец видится, и по закону яко закона Творец, закон исполняя, во храм приносится, и старцу дается.

 

Прием же Сего Симеон праведный, и обещаний сбытие видев совершаемое, радостно вопияше: видеша очи мои еже от века таинство сокровенное, напоследок дний сих явльшееся, (видеша) свет, разоряя (разгоняя) неверных языков омрачение и дая славу новоизбранному Израилю; темже отпусти раба Твоего от соуз сея плоти к нестареемому и чудному нескончаемому животу, подая мирови велию милость.

 

Днесь Симеон на руки Господа славы приемлет, Егоже под мраком первее Моисей виде, на горе Синайской скрижали дающа ему. Сей есть, Иже в пророцех глаголяй и закона Творец! Сей есть, Егоже Давид возвещает, Иже всем страшный, имеяй велию и богатую милость".

 

3. Славословия Господу Иисусу Христу

 

Воспою Тебе, Господи Боже мой, младенствовавшему плотию, и закону повинувшемуся, и спасшему человека, егоже ради быв Человек.

 

Покрыла есть небеса добродетель Твоя, Христе, из кивота бо прошед — святыни Твоея нетленныя Матере, в храме славы Твоея явился еси, яко Младенец руконосим,— и исполнишася вся Твоего хваления.

 

Недр Родителя не отлучся Божеством, воплощся как изволил еси, объятиями держим Приснодевы, на руки подался еси Богоприимца Симеона, рукою Твоею держай всяческая.

 

В церковь принеслся еси, Жизнь всяческих, мене ради младенствовав; под законом был еси, древле начертав на скрижалех закон на горе Синайстей, да вся освободиши от законныя древния работы. Слава благоутробию Твоему, Спасе! Слава Царствию Твоему! Слава смотрению Твоему, Едине Человеколюбче!

 

На руках старческих яко на колеснице Херувимстей, благоизволивый во днешний день восклонитися, Христе Боже, избави Призываемый, страстей мучительства и нас, поющих Тя, и спаси яко Человеколюбец.

 

Душевными Тя руками сподоби мя, Благодетелю, возприяти, как древле Симеон, и насладитися Твоея благости: Ты бо еси Един желание и сладость, Превозжеленный!

 

4. Славословия Богоматери

 

Богородице Дево, упование Христианом, покрый, соблюди, и спаси на Тя уповающих.

 

Богородице Дево, миру благая Помощнице, покрый и соблюди от всякия нужды и печали.

 

О Девице Марие! Просвети мою душу, помраченную люте житейскими сластьми.

 

Из Троицких листков архиепископа Никона (Рождественского)

 

Метки к статье: Троицкие листки, Никон Рождественский
Автор материала: пользователь Переправа

Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.
Комментарии к посту: "Праздник Сретения Господа нашего Иисуса Христа в Церковных песнопениях"
Имя:*
E-Mail:*